Ginatsekyar na sang Bacolod Police Station 6 ang mga CCTV footages sa mga establishimento sa palibot sang motel sa Barangay Taculing agud matumod kun sa diin nagpadulong ukon nagikan ang supetsado sa pagpamuno sa isa ka commercial sex worker, Miyerkules sang gab-i.
Suno kay P/Maj. Leo Estopa, station commander sang Bacolod Police Station 6, una nila nga ginseguro amo ang kondisyon medikal sang 37 anyos nga biktima nga maayo na sa karun ang kahimtangan, samtang ginabulong sa ospital.
Madumduman nga ang biktima nga ginkilala kay Jedda Atayan ang ginbuno-buno sang improvised screw driver sang iya nga customer matapos nga magpanukot ini sang bayad sang nagrequest sang ikaduha nga round ang suspect.
Ang insidente ang nagluntad sa Taculing Court ang natabo takna alas-10:50 sang gab-i kun sa diin nahibaluan nga tricycle driver ang suspetsado.
Gilayon naman sini nga ginpaburhot ang motorsiklo matapos nga gintudlo sa room boy nga ang biktima na ang magabayad, apang nasapwan nalang ang biktima nga duguon.
Sa karun nagapadayun pa ang follow-up investigation agud matumod ang wala pa makilala nga suspetsado.
Ginalantaw sa karun sang mga kapulisan ang testimonya sang mga staff sang establishimento, kasubong man ang CCTV footage sa palibot nga lugar.
Nagakolekta naman ang mga ini sang sunod-sunod nga CCTV Footage tubtob sa makita ang ginhalinan kag ginpadulungan sini kag mahatagan sang hustisya ang biktima kag makapasaka sang kaso sa suspetsado.
Suno kay Estopa, naghinala ang room boy sadto sang nagadali nga maggwa ang driver kag nagpahayag nga ang babayi na ang magabayad, matapos nga hinali nalang sini nga ginsaruso ang gate kag magsibad sang nabuksan na ini sang empleyado.
Ini man ang rasun sa pagtsekyar sang empleyado sa kwarto kun sa diin nakita nga duguon kag may buno sa nagkalainlain nga bahin sang lawas ang commercial sex worker.
Samtang suno kay Estopa, ginpamangkot man nila ang management sang motel natuhoy sa CCTV Camera sang establishimento apang indi ini klaro bangod sa madulom ang lugar.
