Arestado ang isa ka persona matapos nga nagpamukpok sang bato kag nagpang-agaw sang tricycle sa Bacolod Economic Highway, Hda Gonzaga, Brgy Mansilingan Bacolod.
Ang biktima ang ginkilala nga si Edmund Tolosa.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, ang nadakpan nga si ALMER ang nagpakuno-kuno nga pasahero kag nagpadul-ong sa Hacienda Guanzon.
Apang pag-abot sa nasambit nga lugar, ginlampusan sini ang driver kag sang nalipungan, ginhal-id niya ini sa higad sang dalan kag gintaban ang tricycle antes nagpadulong sa ciudad sang Bago.
Nadakpan naman sang mga kapulisan sang Bago City Police Station ang suspek kag narecover man ang tricycle matapos nga gintudlo sini kun diin niya ginbilin.
Ang biktima nga nagaedad sang kapin 30 anyos ang nakita sa hilamunan nga may samad sa ulo ang gindala gilayon sa Corazon Locsin Montelibano Memorial Regional Hospital, apang alas-3:30 subong nga hapon, ini ang ginbawian sang kabuhi bangod sa severe traumatic brain injury.
Nakahunong na sa Bacolod Police Station 7 ang suspetsado kag magapangatubang sang nagakaigo nga kaso.
