Patay ang isa ka lalaki matapos nga gintiro sa Ylagan Extension, Barangay 6, ciudad sang San Carlos, Negros Occidental, sang Lunes sang gab-i, December 18.
Ginkilala ang biktima sa kay Peter Paul Orbita, 39, tricycle driver, residente sang nasambit nga lugar.
Sa interview sang Bombo Radyo Bacolod kay Police Major Ryan Villasario, deputy chief of Police sang San Carlos City Police Station, ang biktima ang nagatindog sa dalan kag hinali lamang ginpalapitan sang suspek kag gintiro sang makapila ka beses.
Suno kay Villasario, ang biktima ang gindala pa kuntani sa ospital apang gindeklarar nga dead on arrival.
Suno diri, ginaimbestigaran pa nila sa karun ang nagluntad nga shooting incident apang may yara na sila sang persons of interest.
Nagahulat sa karun ang San Carlos City Police Station sang witness sa insidente agud nga mapasakaan sang kaso ang suspek agud mahatagan sang hustisya ang kamatayon sang biktima.
Samtang, ginalantaw sang mga kapulisan nga may kaangatanan sa illegal nga druga ang pagtiro sa biktima bangud isa man ini sa mga drug personality sa nasambit nga ciudad.
Apang bukas man ang mga kapulisan sa iban pa nga anggulo kag kun ano pa man ang madiskubrehan sa ila imbestigasyon nga mahimo mangin motibo sa pagpatay sa biktima.
Narekober sa shooting incident ang lima ka empty shell sang caliber .45.
