Patay ang isa ka tricycle driver matapos makabunggo sa truck sang Nobyembre 9, 2024 sang hapon sa Barangay Ani-e, Calatrava, Negros Occidental.
Ginkilala ang biktima kay Sabiniano Amaro, 61-anyos sang Barangay Lagaan sang nasambit nga banwa apang nakaluwas ang menor de edad nga kaupod sini.
Samtang ang driver sang Fuso Fighter nga truck ang 50-anyos nga ginkilala kay Diogenes Albarico nga residente sang Barangay Bantayanon sa nasambit nga banwa.
Sa interview sang Bombo Radyo Bacolod kay Police Major Wilfredo Benoman, hepe sang Calatrava Municipal Police Station, santo sa panaysayon sang driver sang truck nagabiyahe ini padulong sa Barangay Minapasuk agud nga magdeliver sang iya nga mga kargamento samtang ang tricyle ang nagabiyahe sa opposite direction.
Ang lugar kun sa diin nagluntad ang insidente ang talaklaron kag dulhugon.
Nakita man sang driver sang truck ang tricycle nga nagapadulong gani nagserbato man ini kag nag-apply man sang full break.
Dugang pa nga bangud madamo sang karga sini indi na niya makontrolar sang maayo ang manibela.
Apang gin-agaw sang tricycle ang lane sang truck rason nga nagluntad ang aksidente.
Gin-athag ni Benoman nga isa lang ang napatay apang ang 5 anyos nga bata nga lalaki ang ginpaidalom naman sa CT scan agud nga matsekyar kun may yara ini iban nga samad tuga sang insidente.
Temporaryo nga nakahunong sa Calatrava Municipal Police Station ang driver sang truck apisar nga kun lantawon ara ini sa insakto nga lane apang bangud may casualty kinahanglan sang mga ini nga idetain nga makagwa man matapos ang reglementary period.
