Patay ang isa ka tricycle driver samtang pilason naman ang tatlo ka iban pa sa nagluntad nga aksidente sa Diversion Road, Hacienda Leonor, Barangay Paraiso, ciudad sang Sagay, Negros Occidental, Miyerkules sang gab-i, Enero 15.
Ang napatay ang isa ka 37 anyos nga tricycle driver nga manugpauli na kuntani sa ciudad sang Cadiz samtang pasahero naman sini ang iya paryente nga babayi.
Sa interview sang Bombo Radyo Bacolod kay Police Lt Col. Alvimar Flores, hepe sang Sagay City Police Station, apat ka salakyan ang imbulbado sa aksidente nga nagluntad sa ciudad sang Miyerkules sang gab-i nga ginalakipan sang Vehicle 1 ang ISUZU Cargo Truck nga may dala nga tubo; Vehicle 2 ang Cargo wing van truck; Vehicle 3 ang trailer truck kag Vehicle 4 ang Kawasaki Tricycle.
Suno kay Flores, ang isa ka driver sang truck ang wala nasamaran apang ang mga driver sang duha ka truck kag ang nagasakay sa tricycle ang nasamaran samtang ang tricycle driver ang dead on arrival sa ospital.
Suno diri, ang truck nga may dala nga tubo ang nagamaneuver na padulong sa sugar central, ang wing van ang nagpundo bangud nagamenuever ang cargo truck kag ginhulat nga makalabay kuntani apang ang isa ka trailer truck sang sugar central ang nagapadulhog apang nadulaan sang control rason nga nagkarambola ang mga ini.
Suno kay Flores natimingan man nga naglabay ang tricycle kag pagkarambola natampukan ang mga ini sang tubo.
Ginalantaw nga bangud sa pagtampok sang tubo ang tricycle nga gintunaan sang kamatayon sang driver kag pagkasamad sang pasahero.
Nakadetain na sa Sagay City Police Station ang driver sang trailer truck kag nakahanda naman ang mga papeles sang kaso nga ipasaka batok diri, apang ginahulat pa ang desisyon sang pamilya sang biktima.
Sa tion nga makadesisyon ang pamilya, ang kaso nga pangatubangon sini amo ang Reckless Imprudence resulting to Homicide, Physical Injuries and Damage to Property.
Gin-athag man ni Flores nga indi hubog ang driver sang trailer truck.
