Pilason ang isa ka tricycle driver matapos ini maluthang sang iya kapareho man nga driver sa Sitio Baog, Barangay Mansablay, banwa sang Isabela, Negros Occidental sang gab-i sang Hunyo 24.
Ginkilala ang biktima kay Alyas Jose, 24 anyos, residente sang Sitio Cabite, Barangay Santol, Binalbagan.
Samtang ang ginatudlo nga suspek amo si Alyas Jesmar, 44 anyos, kag nagapuyo sa Barangay Cansalongon, Isabela.
Ang suspek kag ang biktima ang lunsay mga traysikol driver.
Sa interview sang Bombo Radyo Bacolod kay Police Lt. Ildefonso Leonardo, Deputy Chief of Police sang Isabela Municipal Police Station, nagasakay sa traysikol ang biktima kag sang naglabay sa lugar sang insidente, nagwa sa katubuhan ang suspek kag gilayon nga gintiro si alyas Jose kun sa diin naigo sa likod.
Gindala sa ospital ang biktima agud madapatan gilayon sang pagbulong samtang ang suspek ang nakahunong na sa Isabela Municipal Police Station matapos nga madakpan paagi sa hot pursuit operation.
Daan nga hiligut-anon ang nakita nga motibo sa pagtiro sa biktima.
Mahimo nga mangatubang sang kaso nga frustrated murder ang suspetsado apang magadepende pa ini sa assessment sang fiscal.
