Ginadihon na sa karun ang pagpasaka sang kaso nga acts of lasciviousness batok sa 40 anyos nga driver sang tricycle matapos gin-alegar nga ginmolestyahan ang 20 anyos nga pasahero.
Sa interview sang Bombo Radyo Bacolod sa biktima, nagatrabaho ini bilang kabulig sa balay sa Glendale Homes sa Barangay Granada syudad sang Bacolod kag nagbantay siya sang tricycle kahapon sang hapon kun sa diin nakasakay siya sa tricycle nga ginamaneho sang 40 anyos.
Una nga gindul-ong sang driver ang duha ka pasahero nga lalaki kag babayi kag siya nalang ang nabilin.
Suno sa biktima gindul-ong siya sang driver sa ila balay apang samtang yara sa kakampuhan ginpahinayan niya ang pagpadalagan sang tricycle kag sang lapit na sila sa payag, ginhambalan siya sang tricycle driver nga may himuon sila sa payag kag hatagan siya sang P500 apang ginpasakayan lamang ini sang biktima.
Ginhambalan sang 20 anyos nga biktima ang driver nga bwas nalang kag nagpati man ang driver kag nagmaneho ini liwat.
Suno sa biktima, liwat nga nagdulog ang driver kag ginhikap ang dughan sini, magluwas sini ginbutong pa sang driver ang nawala nga kamot kag ginpahikap ang atubangan sini apang gilayon man na bawi sang biktima.
Ginpilit pa sang suspek ang biktima apang nagpanindugan ini nga masunod lamang nga adlaw.
Ang biktima ang ginpanaog lamang sang driver sa bangga sang ila balay.
Nagpanindugan man ini nga pasakaan gid sang kaso ang suspek bangud sa indi maayo sini nga ginhimo.
Sa interview naman sang Bombo Radyo sa 40 anyos nga tricycle driver, ginpamangkot niya ang tagreklamo kun pila ang iya nga sweldo sa iya nga ginaubrahan sa subdivision kag nagsabat ini nga P3,000 gani nagtanyag ang tricycle driver nga siya ang hatagan sang P500 bilang bulig.
Nagpundo ini kag gin-uyatan ang nawala nga kamot sang babayi agud ibutang ang P500 apang gintapi niya ini kag nagtupa sa iya nga dughan.
Suno sa babayi, bwas lang sa gab-i niya kuhaon ang kwarta kag nagkasugot sila kun sa diin sila makit-anay.
Sa ikaduha nila nga pagpundo, ginkuha sini ang kamot sang babayi agud nga kuoton ang kwarta sa iya nga belt bag apang nagbalibad ini.
Ginhimas sang tricycle driver ang dughan sang babayi kag ginpahimas man niya sa nawala nga kamot sang tagreklamo ang iya nga kinatawo.
Ginpanindugan sini nga wala siya sang sala sa natabo apang naghingyo man ini sang pasaylo.
