Napasakaan na sang kaso nga acts of lasciviousness ang 40 anyos nga tricycle driver nga gin-alegar nagmolestya sa 20 anyos nga pasahero.
Ang biktima nagatrabaho bilang kabulig sa balay sa Glendale Homes sa Barangay Granada syudad sang Bacolod kag nagbantay ini sang tricycle kun sa diin nakasakay siya sa tricycle nga ginamaneho sang 40 anyos.
Suno sa biktima samtang yara sa kakampuhan ginpahinayan sang driver ang pagpadalagan sang tricycle kag sang lapit na sila sa payag, ginhambalan siya sang tricycle driver nga may himuon sila sa payag kag hatagan siya sang P500 apang ginpasakayan lamang ini sang biktima.
Ginhambalan sang 20 anyos nga biktima ang driver nga bwas nalang kag nagpati man ang driver kag nagmaneho liwat.
Suno sa biktima, liwat nga nagdulog ang driver kag ginhikap ang dughan sini, magluwas sini ginbutong pa sang driver ang nawala nga kamot kag ginpahikap ang atubangan sini apang gilayon man na bawi sang biktima.
Sa interview sang Bombo Radyo kay Police Major Joery Puerto, station commander sang Bacolod Police Station 5, napasakaan na ang driver sang kaso nga acts of lasciviousness.
Mahimo nga makapyansa ang driver apang wala pa nahibaluan kun pila ang mahimo sini nga ibayad bangod wala ini sang proof of indigency nga pagabasehan sang prosecutor’s office kun pila ang mapiyansa.
Ang 40 anyos nga tricycle driver may apat ka kabataan kag may mga apo naman.
Samtang wala pa naaresto ang 24 anyos nga lalaki nga ginaalegar naghimulos sa isa ka 15-anyos nga dalagita sa Barangay Granada nga nagabusong na sa karon sang lima ka bulan bangod wala pa nakagwa ang warrant of arrest batok diri.
