Patay ang isa ka tricycle driver matapos gintiro sang makapila ka bes sang riding-in-tandem suspects sa Phase 2, Barangay Pahanocoy, Bacolod takna alas-7:30 sini nga aga.
Ginkilala ang biktima kay Noel Peraren, 54-anyos kag residente sang Purok Bantud, Barangay Pahanocoy.
Suno kay Bacolod City Police Office (BCPO) spokesperson P/Lt. Col. Ariel Pico, nagamaneho sang tricycle si Peraren sang ginsunod-sunod ini tiro sang mga suspetsado tubtob nga ginbawian siya sang kabuhi sa atubang sang isa ka tyangge.
Ginapahayag tatlo tubtob lima ka lupok ang nabatian sa lugar.
Suno kay Pico, nakuha nila sa crime scene ang tatlo ka basiyo kag isa ka slug sang gina-alegar caliber .45 pistol.
Ginkumpirmar man sang tagpamaba nga indi drug personality ukon drug surrenderer si Peraren.
Apang, ginserbehan ini sadtong 2013 sang search warrant bangud sa paglapas sa Republic Act 10591 ukon Illegal Possession of Firearms kun sa diin nakapyansa man ang biktima.
Sa karon, padayon pa ang pagtipon sang kapulisan sang impormasyon agud mahibaluan kun ano ang motibo sa pagpatay kay Peraren.
