Padayun ang pagbyahe sang mga tricycle drivers apisar sang pag-ulan sang abo gikan sa Bulkan Kanlaon sa banwa sang La Castellana.
Ini kasunod sang nagluntad nga moderately explosive eruption alas-7:04 kagab-i, kun sa diin ang pinaka-apektado sang ashfall amo ang Brgy Sag-ang kag Robles sa banwa sang La Castellana.
Apang ang ashfall ang nagdangat man sa banwa sang Binalbagan, tubtob pa sa Brgy Tiling, Cauayan.
Nagsuspender naman sang klase sa tanan nga lebel sa Himamaylan City kag banwa sang Binalbagan subong nga adlaw.
May 10 ka pamilya ukon 40 ka indibidwal naman nga nagbakwit sa Brgy Robles, La Castellana kagab-i.
May 13 man ka pamilya ukon 40 ka indibidwal nga nagbakwit sa Brgy Ara-al kag Brgy Yubo sa La Carlota City.
Isa sa tuman nila nga ginakahangawa amo ang nakita nga pyroclastic density currents gikan sa summit.
Nagakahangawa ang mga pumuluyo nga ini ang lava, nga mahimo mag-ilig panaog.
Sa pihak sini, madamo sang mga tricycle drivers nga padayun sa pagbyahe.
Sa interview sang Bombo Radyo Bacolod kay Jorlan Jugas, gintabunan lang sini sang plastic ang atubang sang tricycle agud indi mapuling sang abo ang ila mata.
Suno diri, karun lamang ini natabo bangod sa nakaligad nga paglupok, naglapaw lamang sa banwa ang epekto sang ashfall.
Pahayag sini, nga ginpili nila nga magbyahe bangod madamo sang mga pumuluyo nga nagapakadto pakari, kag sa masami malayo pa ang ginakadtuan matapos sang paglupok sang Bulkan.
Madamo sa mga ini ang ginadul-ong nila sa terminal sang Ceres bus.
