Tatlo ang pilason sa pagbungguanay sang tricycle kag SUV sa Camporaso Street, Barangay Poblacion, San Enrique, Negros Occidental kahapon sang hapon.
Sa interview sang Bombo Radyo kay Police Major Renante Salgado, hepe sang San Enrique Municipal Police Station, may dala nga saging ang tricycle nga ginamaneho ni Franklin Loping, 26 anyos, manugbaligya sang saging kaupod si Richard Busayong, 26 anyos, lunsay mga residente sang Hacienda Victoria, Barangay Tabao, Negros Occidental.
Suno kay Salgado, ginamaneho naman ni Mary Ann Nueva Excija, 35 anyos kag residente sang Barangay Cabanbanan, Himamaylan City ang isa ka Suzuki jimny jlx-at wagon.
Suno diri, nag-overtake si Excija sa isa pa gid ka salakyan kag nagkadto sa lane nga ginausoy sang tricycle.
Sang nakit-an ni Loping nga ginasugata ini sang salakyan, naghana pa ini kuntani nga maglikaw apang nagsampukanay ang mga ini.
Nakaangkon sang pilas sa nagkalain-lain nga parte sang ila lawas sanday Luping kag Busayong.
Gilayon nga gindala ang mga ini sa balaybululngan.
Nakaagom naman sang minor nga pilas sa kamot ang suspetsado kag yara sa karun sa kustodiya sang San Enrique Municipal Police Station.
