Tricycle, nagbaliskad matapos makabunggo sa ginasundan nga kotse sa Brgy Tangub, Bacolod City

Nabunggo ang isa ka tricycle nga may sakay nga mga pasahero sa salakyan nga ginasundan sini samtang nagabyahe sa bahin sang Purok Paghidaet, Brgy Tangub, Bacolod City, kahapon sang hapon.

Sa interview sang Bombo Radyo kay Toto Malagsik, driver sang toyota corolla, nagabyahe ini papauli kag maliko ini kun tani sa intersection sa Purok Paghidaet kun sa diin ginpahinayan sini ang iya dalagan agud palabyon ang isa ka salakyan.

Apang, wala naman nakapangaman ang tricycle nga nagasunod sa iya kag amo nga nabunggo ini sa likod sang iya salakyan.

Bangod sa impact, nagbaliskad ang tricycle.

Gilayon naman nga gindala ang mga biktima sa malapit nga ospital agud mahatagan sang nagakaigo nga pagbulong.