Wala sang may nagluntad nga kinagamo sa ginpatigayon nga A Trillion Peso March rally kahapon.
Sa interview sang Bombo Radyo kay 1st Lt Fevie Fajardo, Civil Military Operations sang 79th Infantry Battalion, wala sang may narekord nga indi maayo kag nangin malinong ang pagconduct sang rally.
Suno diri, wala nagsuksok sang uniform ang militar sa paglibot-libot kag pagmonitor sa palibot apang handa sila kun kinahanglanon ang ila intervention.
Samtang, nagapabilin nga nakaheightened alert ang Negros Occidental Police Provincial Office apisar nga natapos na ang protest rally kahapon.
Suno kay NOCPPO Spokesperson Police Captain Judesses Catalogo, wala sang may narekord nga untoward incident nga nagluntad sa rally nga nakahalit sa pumuluyo.
Suno diri, wala naman sang iban pa nga rally nga ginhiwat sa probinsya apang kumpirmado naman nga may mga pumuluyo sang iban nga banwa kag ciudad nga nag-upod sa rally sa Bacolod City.
Samtang…may ginpatigayon man nga A Trillion Peso March rally sa ciudad sang Dumaguete, Negros Oriental kahapon.
Sa interview sang Bombo Radyo Bacolod kay Police Regional Office – Negros Island Region (PRO-NIR) Spokesperson Police Lt Col Joem Malong, generally peaceful ang ginpatigayon nga rally sa probinsya sang Negros Occidental kag Negros Oriental kag wala sang may nagluntad ang kinagamo.
Suno diri, kapin 1, 300 ang nagtambong sa rally sa Bacolod City samtang kapin 700 naman ang nagrally sa Dumaguete City.
Nagapasalamat ini sa kapulisan nga nagbantay kag nakita man sini nga napalab-ot sang mga nag-rally ang ila sintyemento sa gobyerno.
Dako man ang pagpasalamat sang Bacolod City Police Office nga natapos nga malinong ang rally kahapon.
Sa interview sang Bombo Radyo Bacolod kay BCPO Spokesperson Police Captain Andro Maapni, kapin sa 300 ang ila gindeploy kahapon kag sa karun balik na sila sa ila orihinal nga assignment.
Suno diri, iya ginapasalamatan nga nagsunod man ang tanan sa guidelines agud malikawan ang untoward incidents.
