Tripulante sang oil tanker nga gintarget sang cruise missile sang Iran, yara na sa maayo nga kahimtangan

Luwas na kag yara na sa maayo nga kahimtangan ang tanan nga tripulante sang isa ka oil tanker matapos ini nga targeton sang mga “cruise missiles” naggikan sa pungsod Iran kahapon.

Santo sa mga report, tatlo ka cruise missiles ang ginlunsyar sang Iran padulong sa Aqua 1 oil tanker.

Gilayon naman nga nakaresponde ang Qatari armed forces kag madinalag-on nga na intercept ang duha sa mga ini.

Apang, isa ka missile ang nakalusot kag naigo ang barko nga nagtuga sang sunog sa ‘above water level’ nga bahin sang barko.

Natabo ang pagpang-atake 17 nautical miles ang kalayuon sa naaminhan nga bahin sang Ras Laffan Industrial City.