70 porsyento ang pagpati ni Trisha Antiquera nga iya live-in partner, iloy kag stepfather ang mga kalabera nga nasapwan sa sulod sang kampo sa Hacienda Garcia, Barangay Alangilan, Bacolod City.
Madumduman nga namissing ang live-in partner ni Trisha nga si Junel Nangan, iloy nga si Loreville Antiquera, kag live-in partner sang iya iloy nga si Joen Villacojer sadtong Hunyo 2, 2024.
Una nga may nasapwan nga kalabera sa nasambitan nga kampo sang Nobyembre 2024 samtang nasundan sang duha pa ka kalabera kahapon.
Sa interview sang Bombo Radyo Bacolod kay Trisha, isa sa lead nila sa karun agud matumod ang identity sang bangkay amo ang nakita nga dentures ukon pustiso sa una nga kalabera nga nakita kapin alas-9:00 sang aga, nga ginapatihan iya sang babayi.
Suno diri, may-ara man sang pustiso sa ibabaw nga unto ang iya iloy.
Apang suno sa imbestigador, isa lamang ka pustiso ang nakita, samtang ang kay Loreville ang yara sa duha ukon tatlo.
Aminado si Trisha nga indi gid sini kabisado ang pustiso sang iloy bangod talagsa lamang niya ini ginapakita kag ginakuha lamang kun magsunlog ukon magpakadlaw.
Ginalantaw man sini ang posibilidad nga masobra sa isa ka unto ang pustiso sa kalabera apang napalos lamang.
Desidido si Trisha nga mapa-idalom sa DNA testing ang nasambitan nga dentures.
Sa karun 70 porsyento ang iya panagupnop nga ang iya mga ginapangita amo ang mga nasapwan nga kalansay, apang may 30 porsyento paman sa iya kaugalingon nga nagapangabay nga buhi pa ang mga ini.
