Patay ang isa ka trisikad driver matapos ginsulod sa ila balay sang wala makilal-an nga armado nga mga tawo kag gintiro sa Purok Lubi, Brgy.3, Bacolod City kaina pasado alas 09:00 ang takna kaina sang aga.
Ginkilala ang biktima nga si Melchor Chavez, 43 anyos kag residente sang nasambit nga lugar.
Sa interview sang Bombo Radyo kay Rosing Concepcion, isa sa tupad balay kag nakakilala sa biktima, ginpahayag sini nga lunsay lupok lang sang armas ang ila nabatian kag wala sila sang nakita nga may mga tawo nga nagsulod sa balay sang biktima.
Bangud sa pilas sa ulo, gilayon ini nga ginbawian sang kabuhi.
Suno kay Concepcion, ang biktima ang may asawa apang bulagay na sila kag isa ka bata.
Ang asawa kag anak sini ang yara na sa Manila nagatinir.
Wala man ini nakahibalo kun may yara sang atraso si Chavez kag wala man ini nakasiguro kun imbulbado sa iligal nga druga ang biktima bangud ginakabig niya naman ini nga isa ka pamilya.
Samtang, nagapadayon naman ang imbestigasyon sang Bacolod City Police Station 2 sa krimen.
Sa interview sang Bombo Radyo Bacolod kay Police Captain Leo Estopa, station commander sang Bacolod City Police Station 2, wala pa sila sang lead sa pagtiro sa biktima.
Suno diri, nakaagom sang pilas sa ulo ang biktima apang wala pa matumod kun pila ka bilog.
Nagtawag man sila sang 117 agud nga mahatagan sang immediate medical treatment apang gindeklarar man ini nga wala na sang kabuhi.
Gintawgan naman sang Scene of the Crime Operatives (SOCO) agud nga maproseso ang bangkay sang biktima.
Gin-athag man ni Estopa nga wala malakip sa mga drug surrenderers nila ang biktima apisar nga ang lugar nga ginapuy-an sini ang nasubject sadto sa Oplan Tokhang kag ang iya amay ang anay surrenderer.
Padayon pa nila nga ginatsekyar kun may yara sang iban pa nga criminal records ang biktima.
Samtang, gindala naman sa ospital ang kaupod ni Chavez sa balay nga nasalabat sang pagtiro iya.
