Patay ang 33 anyos nga trisikad driver samtang pilason naman ang manghod sini sang sila ginpaarakan sang luthang sa Antonio Luna Interior, Brgy. Mambulac, Silay City, Negros Occidental, sang Sabado, alas- 8:05 sang gab-i.
Ang mga biktima ang ginkilala nga sanday Mark Bitanico, 33 anyos, kag Paulo Britanico, 28 anyos, lunsay mga trisikad driver, kag residente sang nasambit nga lugar.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, naga-inom inom ang mag-utod sa sulod sang ila compound sang may nagpalapit nga wala nakilal-an nga persona kag sila ginluthang.
Suno diri, na-igo sa ulo si Mark nga gintunaan sang gilayon sini nga kamatayon samtang si Paulo naman ang nag-agom sang igo sa likod.
Suno kay Darroca, padayon pa ang imbestigasyon sa pagtumod sa motibo sa krimen apang may yara na sila sang ginakabig nga persons of interest.
