Patay ang 45 anyos nga lalaki matapos ginluthang sa Vervena Street, Brgy 30, Bacolod City alas-10:45 kagab-i.
Ang biktima ang ginkilala nga si Harold Barrios, 45 anyos, single, residente sang Prk Bagong Buhay sa nasambit nga Barangay.
Sa interview sang Bombo Radyo Bacolod kay Police Captain Peter John Ramos, officer in charge sang Bacolod Police Station 6, ang biktima ang remedio heneral ukon lainlain ang obra kaangay sang pag-ihaw sang baboy kag pagbyahe sang trisikad.
Ini ang ginapahayag nga nagabyahe sang trisikad sang ginbantayan sang suspect sa lugar kag gintiro.
Nakaangkon sang igo sa tangkugo ang biktima, samtang narecover man sa crime scene ang isa ka basiyo sang bala, deformed slug kag isa ka kitchen knife.
Gindala pa ang biktima sa ospital apang gindeklarar nga dead on arrival.
Samtang suno sa witness, nagpalagyo ang suspect sakay sa motorsiklo apang wala na nadeterminar kun sa diin padulong.
Ang kapulisan ang may-ara naman sang person of interest sa krimen.
Suno kay Ramos, ang biktima ang may hearing pa kahapon bangod ini ang may ginapangatubang nga reklamo.
Sa ila imbestigasyon, nahibaluan nga masami nga nagabitbit sang patalom ang biktima, kag ini ang madamo man sang reklamo.
Siya ang may ginapangatubang nga panibag-o nga reklamo bangod sa pagpanglampos sa isa ka lalaki, nga indi residente sang Brgy 30.
Sa karun, padayun pa ang imbestigasyon sang kapulisan sa natabo nga krimen.
