Patay ang trisikad driver matapos ginluthang samtang yara sa compound sang iya balay sa San Juan Tunga, Barangay 5, San Carlos City, Negros Occidental alas-7:47 kagab-i.
Sa interview sang Bombo Radyo Bacolod kay Police Captain Rodney Sarona, deputy chief of Police sang San Carlos City Police Station, ang biktima ang ginkilala lamang nga si Alyas Erick, yara sa 30 anyos, single, pedicab driver.
Sa imbestigasyon, nagatindog sa isa ka bahin sang iya balay ang biktima, sang ini ang hinali nga gintiro.
Nag-angkot sang igo sang bala sa ulo ang biktima, nga nagresulta sa gilayon sini nga kamatayon.
Nabatun sang kapulisan ang report alas-8:00 kagab-i kag sila ang gilayon man nga nagpatigayon sang hot pursuit operation kag natigayon nga madakpan ang suspect kapin alas-11:00 sang gab-i.
Suno kay Sarona, ang suspect ang ginatudlo man nga isa sa suspect sa shooting incident sang 2024.
Samtang ini ang duha pa lamang ka bulan nga nakagwa sa prisuhan bangod sa paglapas sa Republic Act 9165 ukon Comprehensive Dangerous Drugs Act of 2002.
Isa sa ginalantaw nga rasun sa pagpatay ang may kaangtanan sa illegal nga aktibidad ilabi na nga si Eric ang yara man sa listahan sang Barangay Anti-Drug Abuse Council (BADAC).
Narecover man nila sa suspect ang cal. 45 pistol.
