Subong nga Martes, mas nangin madasig ang hulag sang Tropical Storm “Enteng” samtang yara sa Northern Luzon, kag karun ini ang yara na sa West Philippine Sea sa kadasigon nga 25 km/h padulong sa Northwestward nga dereksyon.
Dala sang bagyo ang kabaskugon sang hangin nga nagadangat sa 75 km/h kag pagmadlos nga tubtob 125 km/h.
Yara sa Tropical Cyclone Wind Signal no. 2 ang Ilocos Norte, naaminhan nga bahin sang Ilocos Sur, Apayao, Abra, Kalinga, kag nakatungdan nga bahin sang Mainland Cagayan kalakip na ang Babuyan Islands.
Samtang Tropical Cyclone Wind Signal no. 1 naman sa nabilin nga bahin sang Ilocos Sur, naaminhan nga bahin sang La Union, Mountain Province, Ifugao, naaminhan nga bahin sang Benguet, Batanes, nabilin nga bahin sang Mainland Cagayan, nabilin nga bahin sang Babuyan Islands, Isabela, naaminhan nga bahin sang Nueva Vizcaya, kag naaminhan nga bahin sang Quirino.
Malauman ang mas mabaskog kag masami nga mga pag-ulan sa mataas nga mga lugar partikular na sa mga kabukiran gani padayun nga pahanumdom ang pag-aligmat sa mataas nga tyansa sang mga pagbaha kag landslide.
Ginpabaskog man sang bagyo ang Southwest Monsoon ukon Hangin Habagat nga magadala sang kasarangan tubtob sa makusog nga pag-ulan sa pila ka bahin sang Luzon tubtob sa masunod nga tatlo ka adlaw.
Subong nga Martes, ang Habagat ang malauman nga magadala sang maulanon nga panahon partikular na sa Ilocos Region, Nueva Vizcaya, Quirino, Zambales, Bataan, Aurora, Bulacan, Metro Manila, CALABARZON, MIMAROPA, Bicol Region, Western Visayas, diri sa atun sa Negros Island kasubong man sa Northern Samar.
May gindagdag naman nga Gale Warning sa kadagatan sang Northern Luzon kag eastern seaboard sang Central Luzon, gani kanselado ang byahe sang mga barko padulong sa nasambitan nga areas.
Dako ang tyansa nga ang Tropical Storm “Enteng” ang magabaskog sa Severe Tropical Storm category karun sa hapon ukon sa gab-i, kag magadangat sa Typhoon category Huwebes.
Ang bagyo ang ginalauman nga maggwa sa Philippine Area of Responsibility bwas sa aga.
Ini ang ginalantaw nga padayun nga magahulag sa west northwestward nga dereksyon subong nga adlaw, kag magaliko sa nakatungdan nga dereksyon bwas samtang yara sa West Philippine Sea.
Sa Sabado, ang bagyo ang ginalauman nga magalab-ot na sa Hainan, China.
