May yara na sang initial nga pag-estoryahanay ang tag-iya sang Fuso Truck kag ang pamilya sang motorcycle rider nga napatay matapos mabungguan kag malapakan sang nasambit nga truck sa bahin sang Barangay San Teodoro sa banwa sang Binalbagan,Negros Occidental.
Ang biktima ang ginkilala nga si Alyas Patrick, 24 anyos, single, wala sang lisensya, residente sang Brgy Santo Rosario, Binalbagan; apang ang itom ukon gray nga motorsiklo ang natumod nga nakarehistro kay Alyas Nolan.
Ang driver sang pula kag green nga Mitsubishi Fuso Truck ang gikilala naman nga si Alyas Rye, 31 anyos, kasado, may drivers license kag residente sang Sitio Velez, Brgy Mahalang, Himamaylan City, Negros Occidental.
Sa interview sang Bombo Radyo Bacolod kay Police Captain Joelan Vinzon, hepe sang Binalbagan Municipal Police Station, ang biktima ang nagamaneho sang iya motorsiklo papauli na halin sa iya trabaho sa ciudad sang Kabankalan.
Suno kay Vinzon, pagdangat sa area sang insidente, ang motorsiklo ang hinali nga nagsignal sa pagliko sa wala kun sa diin hinali lang nga may nag-overtake nga van.
Bangud sini, nabungguan sang truck ang buli sang motorsiklo rason nga naglabog ang biktima.
Nagtupa sa sementado nga dalan si Patrick, apang nagderetso ang truck sa iya nga dereksyon kag siya ang nalapakan.
Gindala pa sa Binalbagan Infirmary ang biktima apang ini ang gindeklarar nga dead on arrival.
Boluntaryo naman nga nagsungka sa Binalbagan Municipal Police Station ang truck driver.
Sa karun handa nga magbulig ang tag-iya sang truck sa nalisdan nga pamilya.
