Patay ang truck driver matapos ginluthang sang security guard nga kaupod sini sa ginatrabahuan nga construction site sa Purok Florenceville, Barangay Pahanocoy, Bacolod City.
Ang biktima ang ginkilala nga si Benigno Zamora, 43 anyos, kasado, kag residente sang Purok Kalubihan 1, Barangay Mailum, Bago City samtang ang suspect ang ginkilala nga si Rolly Escaro Deocampo, 44 anyos, residente sang Barangay Burgos, Cadiz City.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8 ang insidente ang natabo alas-4:35 kahapon sang hapon.
Suno kay Cayao, ang duha ang may-ara na sang daan nga indi paghangpanay kag natabuan nga nagtabuay sa trabaho kahapon.
Nahibaluan nga si Zamora ang nagpangayo sang trip ticket sa pagdeliver sang construction supplies kay Deocampo apang bangod sila ang may daan nga indi paghangpanay, ini ang nagdangat sa pagbaisay.
Suno kay Cayao, ang biktima ang ginluthang sang security guard gamit ang issued firearm sini nga cal. 38 revolver.
Ang biktima ang nakaangkon sang samad sa likod kasubong man sa likod nga bahin sang dulunggan.
Narecover sa crime scene ang duha ka empty shell sang cal. 38 kag apat ka live ammunition.
May-ara naman sang nakawitness sa krimen kag ang mga ini ang nakuhaan naman sang affidavit para sa pagpasaka sang kaso subong nga hapon.
