Patay ang isa ka truck driver matapos nga gintiro sang wala pa makilal-an nga suspetsado sa Hacienda Siocon, Barangay Lopez Jaena, banwa sang Murcia, Negros Occidental kaina sang hapon, Oktubre 24.
Ginkilala ang biktima kay Alias Ernesto, 56 anyos, kasado, driver kag residente sang Purok Madre de Cacao, Barangay Sta. Cruz, Murcia.
Ang suspetsado ang wala pa makilal-an.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, may nagtawag sa ila agud nga ipahibalo nga may yara sang nagluntad nga shooting incident kag gilayon man nila nga ginpadulungan.
Wala na sang mga kapulisan maabtan ang biktima bangud gindala na ini sa sentro agud madapatan sang nagakaigo nga pagbulong matapos nga nakaangkon sang pilas sa nagkalain-lain nga bahin sang lawas.
Apang gindeklarar man nga patay na.
Ang biktima ang masugat kuntani sang mga tapasero sang tubo sang ini ang gintiro sang wala makilal-an nga suspek gamit ang wala pa matumod nga kalibre sang armas-luthang.
Narecover sa crime scene ang basiyo sang wala pa matumod nga kalibre sang armas-luthang.
Nagapadayon sa karun ang imbestigasyon sang mga kapulisan kag natalana nga ipaidalom sang katapo sang Scene of the Crime Operation (SOCO) sa autopsy ang bangkay sang biktima.
Sa karun nagapadayon man ang hot pursuit operation sa mga kapulisan agud madakpan ang suspetsado.
