Yara na sa 50.51 percent ang completion rate sang ginatukod nga support column nga sayluhan sang main water pipe sang Bacolod City Water District nga yara sa tunga sang Bakyas Bridge sa Barangay Mansilingan.
Sa interview sang Bombo Radyo Bacolod kay BACIWA General Manager Mona Dia Jardin, nagalaom ini nga antes matapos ang tuig, masaylo na ang tubo.
Liwat ini nga nagpangayo sang pasaylo nga nadugayan ang proseso bangod suno sa iya ang Prime Water ang nakig-angot pa sa Department of Public Works and Highways kag ginhulat pa ang desisyon sang DPWH Region 6.
Nagapati si Jardin nga may plano na ang Prime Water kun paano masaylo ang tubo nga wala sang dako nga huol sa mga magalabay sa taytay ukon sa mga konsumedor.
Madumduman nga madugay na nga ginareklamo ang tubo nga wala natandog sang nagpatigayon sang widening, gani ini ang nagpabilin sa tunga sang taytay nga tuman ka delikado sa motorista.
Ang tubo ang main line sang BACIWA gani aminado si Jardin nga madamo sang madulaan sang water supply sa pagsaylo sang tubo partikular na sa Barangay Mansilingan kag Taculing kasubong man pila ka bahin sang Barangay Alijis.
Pasalig sini nga magapagwa man sang notice ang Prime Water sa tion nga isaylo na ang tubo nga mahimo patigayunon sa gab-i agud indi tuman ka huol sa mga motorista kag konsumedor.
Yara man ang posibilidad nga magpatuman sang temporary closure sa taytay.
Tinguhaan man nila nga matapos ang pagsaylo sa sulod lamang sang isa ka adlaw agud madasig nga mabalik sa normal ang operasyon sang taytay kag sang water distribution.
