Gintawag sang convenor sang Water Watch Negros nga “tug of war” ang internal conflict sa liderado sang Bacolod City Water District (BACIWA), kag nagapanawagan nga indi dapat maapektuhan ang serbisyo.
Sa interview sang Bombo Radyo Bacolod kay Wennie Sancho, may-ara gid sang internal conflict bangod nagabalibad sa pagpanaog bilang General Manager si Mona Dia Jardin, samtang wala man sang mahimo si Engineer Michael Soliva kundi ang magbulos sa pwesto matapos gin-appoint sang Board of Directors bilang Acting General Manager.
Panugyan sini kay Jardin nga kun may reklamo, ini ang awayon na lamang sa legal nga pamaagi.
Apang kwestyon pa kun sa diin ini mahimo magfile sang complaint, sa Civil Service Commission bangod Government Owned and Controlled Corporation (GOCC) ang BACIWA, ukon sa National Labor Relations Commission (NLRC) sang Department of Labor and Employment bangod nagsulod sa JVA sa private company.
Panindugan sini nga sa pihak sang leadership conflict, indi dapat matampukan sang issue ang panawagan sang mga member-consumer sa mas maayo nga serbisyo gikan sa BACIWA-PrimeWater.
Sa bahin sang Water Watch Negros, nagapabilin ang ila panawagan nga i-revoke ang Joint Venture Agreement sang BACIWA sa PrimeWater.
Suno diri, sila ang nagpadala man sang sulat nga nagadayaw sa pagpungko ni Soliva, apang kaupod man sini ang pahanumdom nga magperform sang duty santo sa ekspektasyon sang mga konsumedor.
Suno kay Sancho, indi dapat mangibabaw ang interes sang mga opisyales sangsa interes sang pumuluyo
Pangabay sini nga makigsapol ang Board upod sa nagasampok nga pamunuan kay Bacolod City Mayor Greg Gasataya, Congressman Alfredo “Albee” Benitez kag chairman sang Committee on Utilities and Public Energy agud masolbar ang konflikto.
