Wala sang problema ang mga street cleaners sa madamo nga basura nga ginbilin sang mga manugbaligya sang Ukay-Ukay kag mga manugbakal sa Dalan Araneta kag Luzuriaga kaina sang kaagahon, apang panawagan sang mga ini nga himuson ang mga bato nga gingamit sa pagtukod sang stalls.
Sa interview sang Bombo Radyo Bacolod kay Agustin, street cleaner, dutayan lamang ini maaksidente matapos madalin-asan sang iya motorsiklo ang nagalapta nga mga bato.
Suno diri, yara pa sa madulom nga bahin sang dalan nahamtang ang mga bato nga ginbangil sa haligi sang mga stalls.
Pahayag ni Agustin nga wala sila sang problema bisan nagdamo ang basura apang hingyo lamang sang mga ini nga himuson ang mga bato bangod ini ang makatuga sang disgrasya.
Samtang sa interview naman sang Bombo Radyo Bacolod kay Josephine Villaruel, alas-2:00 pa lamang sang kaagahon, nagpadulong na sila sa area agud magpaninlo bangud nakaandan na nga kada matapos ang baligyaanay sang ukay-ukay kada Enero 2, madamo gid nga mga basura ang nagakabilin.
Suno sa iya, obligasyon nila ang magpaninlo bangud ginaswelduhan ang mga ini sang city government kag kun indi nila ini paghimuon, wala sang may maubra sini.
