Pasar sa Mechanical Engineering Licensure Examination kag Licensure Examination for Professional Teachers sa sulod lamang sang isa ka tuig ang tumandok sang Sagay City.
Sa interview sang Bombo Radyo kay Angelou Requiron, tuman ang iya kalipay sa tanan sini nga nalab-ot nga sa karun isa na ini ka engineer kag maestro.
Suno diri, tuig 2020 ini naggradwar sa Technological University of the Philippines Visayas sa kurso nga Mechanical Engineering apang subong lang ini nga tuig nagkuha sang Mechanical Engineering Licensure Examination bangod naglabay ang pandemic kun sa diin nagduha-duha ini sa mga online class.
Bangod nga scholar ini sang Department of Science and Technology amo nga nagrender ini sang iya scholarship apang samtang nagatrabaho nagkuha ini sang Licensure Examination for Professional Teachers.
Nahatagan lamang ini sang kapin napulo ka adlaw para magpreparar para sa LPT apang nagtutok ini sa pagtuon kag amo nga nakapasar.
Pahayag ni Requiron, wala pa ini nakahibalo kun ano ang masunod sini nga plano apang isa sa mga ginapilian sini amo nga kun ini magatinir sa pagtrabaho sini sa Department of Education ukon magpursue sang engineering career ukon magkuha ang isa pa gid ka license para mangin registered master plumber.
Pahanumdom ni Requiron amo nga magpati sa kaugalingon nga masarangan ang isa ka butang bangod ang iban indi man magsalig kun ikaw mismo wala sang pagsalig sa imo kaugalingon.
