Ginawork-out pa sa karun kun mabakante ang schedule ni President Ferdinand “Bongbong” Marcos Jr. sa Enero 25 agud mapatigayon ang turn over ceremony sang Asenso Yuhum Housing Village sa Barangay Vista Alegre, Bacolod City.
Nahibaluan nga ang proyekto ang isa sa mga pilot program sa idalum sang Pambansang Pabahay para sa mga Pilipino (4PH) Program sang Marcos Administration, gani ang turn over ceremony ang pangunahan mismo sang Presidente.
Sa interview sang Bombo Radyo Bacolod kay Bacolod City Councilor Vladimir Gonzales, chairman sa Committee on Housing and Urban Poor Development sa Sangguniang Panlungsod, padayun sa karun ang development sang mga establishimento kag magluwas sa una nga duha ka 4-storey Housing units may-ara pa sang idugang kun sa diin magadangat sa 4,000 ka units ang available sa Arao Residences.
Magluwas sa Barangay Vista Alegre, may-ara man sang natalana nga itukod sa Barangay Estefania nga 4,000 tubtob 5,000 housing units, kasubong man ang 4,000 housing units sa Purok Bayanihan, Barangay Banago nga pagasuguran naman subong nga tuig.
Magluwas sa mga 4-storey housing, may-ara man sang ginatukod nga iban nga amenities sa 6 hectares nga duta sa Barangay Vista Alegre kaabngay sang club house kag swimming pool.
Ginbutangan man sang mga solar panels ang atup sang mga buildings agud nga maka-access sa dugang nga electrical supply.
Pasalig ni Gonzales nga sila ang dugay-dugay man nga naga-update tuhoy sa progress sang proyekto.
Suno diri, ginafinalize naman karun ang tripartite agreement para sa pag-umpisa sang proyekto sa Barangay Banago kag Estefania nga mahimo makapatigayon na sang ground breaking sa masunod nga semana.
Sa kabug-usan, target sang ciudad nga makahuman sang indi magnubo 30,000 housing units nga igahatag sa mga pumuluyo nga wala sang puluy-an kag mga informal settlers kag mga apektado sang demolition.
Paathag ni Gonzales nga ini ang maka-address sa madamo nga mga problema kaangay sang basura kag mga pagbaha, kag makapahapos sa pagtinlo kag pagkay-o sang mga drainage system.
