Nangin matawhay kag madinalag-on ang ginpatigayon nga turn-over ceremony sang transition team sang Benitez kag Gasataya administration kahapon.
Ang seremonya ang ginpatigayon sa City Mayor’s Office sa Bacolod City Government Center.
Sa interview sang Bombo Radyo Bacolod kay Department of the Interior and Local Government (DILG)-Bacolod City Director Christian Nagaynay, ang ginpatigayon nga turn-over ceremony ang kabahin sang ila nga aktibidad sa idalom sang DILG Memorandum 2025-016 kun sa diin ang mga documents kag mga files ang gin-assemble sang transition team ni outgoing Bacolod City Mayor Alfredo “Albee” Benitez kag Bacolod City Mayor Elect Greg Gasataya.
Ang mga dokyumento ang crucial documents nga kaangay sang plans, financial, investments kag human resource kag iban pa.
Suno kay Nagaynay, nangin smooth kag matawhay ang transition.
Ini bangud ang Deparment Heads ang nagpasa man gilayon sang mga nagakaigo kag kinahanglanon nga dokyumento.
Ginkalipay man sini ang compliance nga nagresulta sa matawhay nga transition.
Sa interview sang Bombo Radyo Bacolod kay Atty. Mark Mayo, head sang transition team ni Bacolod City Mayor Elect Greg Gasataya, santo sa ila nga ginlauman nangin matawhay kag nangin madasig ang ginpatigayon nga turn-over ceremony.
Suno kay Mayo may mga dokyumento nga ginpresentar ang Benitez Administration kag ila nga ginbaton.
Suno diri, ini ang mga importante nga mga dokyumento nga ginalantaw sang incoming administration kag ini ang ginalakipan sang annual budget,annual investment plan, personnel, inventory sang assets, contracts and obligation sang ciudad kasubong man ang mga propedad.
Ginalantaw sini nga sa pihak sang transition indi maapektuhan ang serbisyo sang ciudad.
May mga dokyumento pa nga indi man obligasyon sang Local Government Unit ang wala pa maturn-over bangud wala pa nagtapos ang bulan.
Samtang ang nabilin nga pondo sang ciudad ang lantawon pa kun ano ang mahimo diri ilabi na nga tunga-tunga pa lang sang tuig.
