Nangin madinalag-on ang pagpatigayon sang turnover ceremony sang Asenso Yuhum Housing Units sa Arao, Brgy. Vista Alegre, Bacolod City, kaina sang aga.
Sa 21 ka building nga plano, apat pa lang ang naconstruct na, kun sa diin tatlo ka building ang natapos na samtang ang isa ang padayon pa nga ginaconstruct.
64 ka units ang ginturnover para sa 64 man ka homeowners.
Ang kada unit ang may 24 square meter nga kalaparon kag ang balayran ang nagabalor sang ₱2,194.84 kada bulan nga mahimo maimpas sang mga benepisyaryo tubtob sa 30 ka tuig.
Sa model unit nga ginpakita kaina sang aga, may yara sang kwarto, lutoan, sala kag may aircon, apang ang mga homeowners ang magabutang sang partition sa ila unit.
Ang Yuhum Housing Program ang pinaka-una nga housing unit nga ginlunsyar sa bug-os nga Pilipinas sa idalum sang Pambansang Pabahay para sa Pilipino Housing (4PH) Program sang administrasyon ni President Ferdinand ‘Bongbong’ Marcos Jr.
Sa interview sang Bombo Radyo kay Emmanuel Villaera, masobra sa napulo ka tuig na ini nga nagapang-arkila lang kag nagabayad sang P5,000 kada bulan.
Suno diri, dako nga bulig para sa tawo ang housing program sang gobyerno bangod aminado ini nga mabudlay magpa-eskwela sang bata samtang nagabayad sang arkila.
Pahayag ni Villaera, nalipay ini nga sa karun maka-invest na siya sang kaugalingon nga balay.
