Gin-athag sang pinuno sang General Services Office nga wala pa ginpangkakas ang mga television sa mga opisina sa Bacolod Government Center kundi ginpatago lamang sa sulod sang mga opisina bangud ginapangitaan ang mga ini sang memorandum sa pagpangkakas sini.
Sa interview sang Bombo Radyo Bacolod kay Victor Espina, wala sang ginpangkakas nga TV kundi ginpatago lang anay samtang wala pa ang memorandum.
Suno kay Espina, ang ulihi sini nga instruction nga nabaton amo nga dapat iturn-over sang mga opisina ang mga TV sa GSO magluwas lamang sa mga opisina nga may ginhatag nga justification nga ang TV ang ginagamit sa mga webinar ukon official use.
Suno kay Espina, ginmando kuntani sang alkalde sa ila nga kuhaon gid apang bangud may nagpangita sang memorandum, nadesisyunan nga ipatago lang anay kag kuhaon nalang sa tion nga may yara na ipakita nga memorandum.
Sa record sang GSO, may yara sang 133 ka TV nga yara sa mga opisina Bacolod Government Center nga ginapanag-iyahan sang gobyerno.
