BACOLOD CITY – Nagapabilin nga kalmado ang tyempo sa pila ka bahin sang estado sang Florida samtang nagahilapit ang natalana nga pag-landfall sang Hurricane Irma.
Sa exclusive interview sang Bombo Radyo kay William Charles Conroy, isa ka retired US Air Force member kag bana sang isa ka tumandok sang Barangay Taloc, ciudad sang Bago, ginlaragway sini bilang “really unremarkable” ukon halos indi pa mabatyagan ang nagapalapit nga delubyo.
Ini bangud matapos ang manipis nga ulan Sabado sang aga (Sabado sang gab-i, oras sa Pilipinas), nagapabilin nga kalmado kag malinong ang palibot didto.
“Really unremarkable. It rained a little bit today but now it’s calm and quiet. There’s nothing to indicate that a hurricane is coming. We are not experiencing any catastrophic weather”, suno kay Conroy.
Apang ginpahayag sini nga nagapalapit na si Irma kag padulong sa direksyon sang Tampa, nga yara sa pihak naga bahin sang Astor kun sa diin sila temporaryo nga nagapuyo sa balay sang iya utod matapos sila nag-evacuate gikan sa Port Orange.
Sa pihak sini, padayon ang ila paghanda bangud ginalauman na ang paglaslas sang Hurricane Irma sa bug-os nga estado sang Florida.
