Kapin P7 milyones nga balor sang roofing materials ang ginpanagtag sang provincial government sang Negros Occidental sa mga pumuluyo sang banwa sang Candoni nga nagub-an sang balay kadungan sang paglabay sang Bagyo Odette, duha na ka bulan ang nakaligad.
Mismo si Negros Occidental Governor Eugenio Jose ‘Bong’ Lacson ang nagpanguna sa distribution sang roofing materials kaina sang aga kun sa diin 1,476 ka pamilya ang kabug-usan nga nakabaton sang roofing materials.
Ang roofing materials ang ginalakipan sang anom ka corrugated sheets kag duha ka plain sheets nga nagalaba sang walo ka tapak, samtang may gindaho man sa ila nga food packs nga ginabug-usan sang bugas, tinapay kag canned goods.
833 ka recipients ang nagtipon sa gym sang Barangay West Poblacion agud nga magbaton sang materyales nga ginalakipan sang 60 nagikan sa Barangay Cabia-an, 292 sa Barangay Caningay, 252 sa Barangay Gatuslao kag 229 nagikan sa Poblacion West.
643 naman ang nagtipon sa gym sang Barangay Poblacion East nga ginalakipan sang 90 ka residente sang Barangay Agboy, 77 nagikan sa Barangay Banga, 274 nagikan sa Barangay Jaba, 56 nagikan sa Barangay Payao-an kag 146 nagikan sa Poblacion East.
Ang banwa sang Candoni ang ikalima nga LGU sa 6th District sang Negros Occidental nga nakabaton sang roofing materials kag sa masunod nga semana, ang ciudad sang Kabankalan naman ang bisitahan sang Capitol officials.
Kun matapos na ang mga LGUs sa 6th District, managtag na ang provincial government sang cash assistance sa mga pumuluyo sa 5th District apang ang makabaton lamang amo ang mga pamilya nga wala sang nabaton nga ayuda nagikan sa national government kag LGU.
