Sa pinakaulihi nga weather bulletin, ang sentro sang Bagyong Rosal ang ulihi nasiplatan alas-8:00 subong nga aga sa 285 km East Northeast sang Itbayat, Batanes.
Ini ang may kabaskugon sang hangin nga nagadangat sa 150 km/h kag pagmadlos nga tubtob 185 km/h.
Naghuyang naman ang hulag sang bagyo padulong sa northwestward nga direksyon.
Lauman nga maggwa sa Philippine Area of Responsibility (PAR) ang bagyo bwas, Sabado sang aga.
Nakapaidalom gihapon sa Tropical Cyclone Wind Signal No. 2 ang Batanes kag Babuyan Islands.
Samtang, signal no. 1 naman sa nabilin nga bahin sang Babuyan Islands, mainland Cagayan, northeastern portion sang Isabela, Ilocos Norte, kag Apayao.
Lauman ang mabulubagyuhon nga panahon sa Batanes tuga sang bagyo, bantayan man ang posibilidad sang mga landslides kag flashfloods.
Maeksperyensyahan man ang pagbubo sang ulan nga may pagmadlos sa hangin sa Ilocos Norte, Apayao, Cagayan, kag Isabela.
Bantayan man ang lapta-lapta nga mga pag-ulan sa nabilin nga bahin sang Cordillera Administrative Region kag Cagayan Valley, kasubong man sa Ilocos Sur, La Union, kag Aurora nga dala gihapon sang bagyong Rosal.
Mabatyagan naman ang epekto sang trough sang bagyo sa pila ka bahin sang pungsod lakip diri ang Visayas, Zamboanga Peninsula, Masbate, Palawan, Lanao del Norte, Misamis Occidental, Basilan, kag Tawi-Tawi.
Samtang, may posibilidad man sang mga pag-ulan sa Metro Manila kag nabilin nga bahin sang pungsod tuga sang localized thunderstorms.
