Gin-anunsyo ni US President Donald Trump nga naaresto na si Venezuelan President Nicolas Maduro, nga gin-label sang Amerika bilang terorista, upod ang iya asawa nga si First Lady Cilia Flores.
Sa isa ka pahayag halin sa iya Truth Social account, gin-kumpirma sang US President nga nangin madinalag-on ang malapad nga mga strike sang Amerika batok sa Venezuela nga nagresulta sa pagdakop ni President Maduro upod ang iya asawa.
Suno kay Trump, “The United States of America has successfully carried out a large scale strike against Venezuela and its leader, President Nicolas Maduro, who has been, along with his wife, captured and flown out of the Country.”
Suno kay US President, ang operasyon ang ginpatigayon sa bulig sang US Law Enforcement.
Base sa mga international media, ginpahayag sang pila ka mga opisyal nga si Maduro ang gin-aresto sang US Army Delta Force, ang pinaka-una nga counter-terrorism unit sang US military.
Antes sang anunsyo ni Trump, una na nga nag-offer ang Amerika sang 50 million dollars sa kun sin-o ang makahatag sang impormasyon nga magadul-ong sa pagdakop kay Maduro.
Samtang, suno kay Trump, magapatawag siya sang isa ka news conference kahapon. Base man sa isa ka Republican Senator, ginpahayag ni US Secretary of State Marco Rubio nga atubangon ni Maduro ang isa ka trial sa Amerika may kaangtanan sa mga criminal charges batok sa iya, kag wala sang ginapaabot nga aksyon batok sa Venezuela.
Samtang, sa bahin sang gobyerno sang Venezuela, wala pa sang kumpirmasyon nahanungod sa ginahambal nga pagdakop kay Maduro.
