UKRAINE — Ginpahayag ni President Volodymyr Zelenskyy nga preparado ang Ukraine sa pagdiskusyon sang pag-adopt sang neutral status bilang kabahin sang peace deal kaupod ang Russia apang ang ini nga tikang ang dapat may garantiya nagikan sa third parties kag ibutang sa referendum.
Suno kay Zelenskyy, handa ang Ukraine sa security guarantees kag neutrality kasubong man sa non-nuclear status sang ila Estado bangud ini ang pinakaimportante nga point.
Suno sa iya, ang invasion sang Russia ang nagtuga sang pagkaguba sang Russian-speaking nga mga ciudad sa Ukraine kag ang nasambit nga damage ang mas malala sang sa gyera sang Russia sa Chechnya.
Gindiskusyunan sang Ukraine ang paggamit sang Russian language sa Ukraine sa pag-istorya sa Russia apang nagpamalibad nga diskusyunan ang iban pa nga Russian demands kaangay sang demilitarisation sang Ukraine.
Suno kay Zelenskyy, indi posible ang peace deal kun wala sang ceasefire kag pagwithdraw sang mga tropa.
Wala man sini ginlakip ang liwat nga pagbawi sang Russian-held territory pinaagi sa pwersa bangud posible nga ini ang magtuga sang ikatatlo nga world war kag luyag sini nga magdangat sa kompromiso sa bahin sang eastern Donbas region, nga ginauyatan sang Russian-backed forces humalin 2014.
