Naglunsyar sang kapin 1,000 ka mga drones ang Ukrainian forces batok sa Russia, kalakip ang ginatos ka drones nga nagpadulong sa Moscow.
Ang insidente ang kadungan sang ikatatlo kag pinal nga adlaw sang parliamentary elections sang Russia.
Ginlaragway naman sang alkalde sang Moscow ang sunod-sunod nga drones bilang pinakadako nga pagpang-atake sang Ukraine sa Russian capital.
Suno diri, apektado ang Moscow Oil Refinery, isa sa mga naga-supply sa Moscow, kag isa ka residential building.
Tuga sang serye sang mga drones, napatay ang duha ka indibidwal samtang pilason ang 20 ka iban pa, suno sa otoridad.
Ini ang ginalakipan sang isa ka 74-anyos nga lalaki kag 44-anyos nga babayi.
Sa ginpakigbahin sang Ukrainian President nga si Volodymyr Zelenskiy sa social media, ginpahayag sini nga ang Kyiv naggamit sang range of missiles kag drones sa pag-atake kalakip ang ginhimo nga Flamingo kag Pelican missiles agud i-target ang oil kag logistic facilities sang Russia.
Suno sa Ukrainian president, padayon ang ila pag-intercept sang mga Russian drones.
Apang, isa ka drone strike ang nag-igo sa monasteryo sa Kherson region sang Sabado, nga nagresulta sa kamatayon sang isa ka myembro sang clergy samtang, apat naman ang nasamaran.
Isa pa ka Russian attack ang nag-utas sa kabuhi sang duha ka kabataan kag ila nga iloy, sa pareho nga adlaw suno kay Tymur Tkachenko, head sang Kyiv regional state administration.
