UKRAINE – Ginpahayag ni Ukrainian President Volodymyr Zelensky nga wala na sang plano nga magpamiyembro sa North Atlantic Treaty Organization (NATO) ang Ukraine, nga isa ka rasun sa pag-invade sang Russia sa pungsod.
Sa pihak nga bahin, ginpahayag man ni Zelensky sa Moscow nga bukas ini nga mag “compromise” sa status sang duha ka separatist pro-Russian territories nga ginrekognisa ni Russian President Vladimir Putin bilang independent antes paman ginpatigayon ang invasion sang Pebrero 24.
Suno kay Zelensky, nag-atras na ini sa plano nga pag-upod sa NATO matapos mahangpan nga indi pa ang mga ini handa nga batunon ang Ukraine.
Dugang pa sang presidente nga ang alyansa ang nahadlok sa mga kontrobersyal nga butang kag nahadlok sa pagkomprontar sa Russia.
Pahayag ni Zelensky nga indi sini luyag nga mangin presidente sa pungsod nga nagaluhod sa pagpakitluoy maykaangtanan sa pagpamiyembro sa NATO.
Nahibaluan nga ang Russia ang nagpahayag nga indi nila luyag nga ang kaingod nga Ukraine ang magsulod sa NATO, ang transatlantic alliance nga ginhuman sa pag-umpisa sang Cold War agud nga proteksyunan ang Europe gikan sa Soviet Union.
Sa nakaligad nga mga tinuig, ang alliance ang nag-expand pa padulong sa east agud nga agawon ang mga pungsod nga anay katapo sang Soviet Union, nga nagtuga naman sa kaakig sang Kremlin.
Ginalantaw naman bilang pagpamahog sang Russia ang pagdako sang NATO kadungan sa pagpatigayon sini sang mga military exercises sa atubang sang ila nga mga Western allies.
Kasunod lang sang pagmando ni Putin sa invasion sa Ukraine, ginkilala naman sini bilang independent ang duha ka separatist pro-Russian “republics” sa eastern Ukraine nga Donetsk kag Lugansk, nga nagapakig-away na batok sa Kyiv humalin sang 2014.
Sa karun, luyag naman ni Putin nga kilalahon ang mga ini sang Ukraine nga may soberanya kag independent.
Nagpasalig naman si Zelensky nga bukas ini sa pagdialogo sa Russia angot sa ila nga mga demand.
Pahayag sini nga ang luyag lang niya amo ang garantiya sang seguridad.
