Gin-anunsyar ni Ukrainian President Volodymyr Zelensky nga magapadulong ini sa White House agud nga makipagkita kay US President Donald Trump sa Lunes, Agosto 18.
Ini agud nga talakayon ang pag-untat sang giyera sa Ukraine.
Ang natalana nga pagbisita ni Zelensky sa White House ang kasunod sang summit ukon one-on-one meeting sa tunga nanday Trump kag Russian President Vladimir Putin sa Anchorage, Alaska sang Biyernes oras sa Alaska.
Apisar nga napaslawan ini nga magsiguro sang kasugtanan kay Putin angot sa giyera sa Ukraine, nagdesisyon ini nga trabahuon ang peace agreement agud nga dalayon nga mauntat ang giyera sa tunga sang Russia kag Ukraine kag indi lamang ang ceasefire.
Madumduman nga nangin kontrobersyal ang ulihi nga meeting nanday Zelensky kag Trump sa Oval Office sang White House sa Washington DC sang Pebrero 28 subong nga tuig matapos nga naglab-ot sa pagbaisay ang bilateral meeting sang duha nga nagresulta sa pagkanselar sang natalana kuntani nga pagpirma sang rare earth mineral agreement kag gin-eskortan si Zelensky pagwa sang White House.
