Ulan kag hangin ang ginatudlo nga rasun sa dugay-dugay nga nagaluntad nga pagtrip-off sang kuryente sa service area sang Central Negros Electric Cooperative (CENECO).
Sa interview sang Bombo Radyo Bacolod kay CENECO General Manager Atty Arnel Lapore, bangod sa malain nga tiyempo madamo sang nagaluntad nga pagka-utod sang kuryente bangod sa mga kahoy nga nagakalatumba ukon mga sanga sang kahoy nga nagabunggo sa linya.
Magluwas sa pagtrip-off sang 69kv line kahapon, gin-athag ni Lapore nga ang masami nga rasun sang lapta-lapta kag dugay-dugay nga mga brown out ang tuga sang malain nga tiyempo.
Suno diri, bangod tig-ululan madasig man nga magdabong ang mga kahoy kag nagaka-overpass na sang pagtubo ang ginpatigayon nga clearing operations sang tinalikdan.
Isa sa dako nga problema amo ang mga kawayan kun sa diin bisan ini ang 10 ka metros pa ang kalayuon sa linya, nagalab-ot gihapon kun magbend bangod sa mabaskog nga hangin.
Pangabay ni Lapore sa mga member-consumer nga kun ang mga puno ang kahoy ang yara man lang sa ila ugsaran, mas maayo nga magpatigayon sang preemptive approach kag itrim ang mga sarang makalab-ot sa primary ukon secondary lines.
Agud indi na makaperwisyo, mas maayo nga indi na hulaton pa nga may matabo nga browout antes hawanan ang mga nagadabong nga sanga sang mga kahoy.
Paathag sini nga indi kaangay sang summer nga overloading ang problema, sa karun ang pagkatrip-off sang linya naman ang ila ginaproblema.
Suno diri, madasig nga nagatrip-off ang linya bangod kalabanan sa mga ini ang bare wire, gani kalakip sa proyekto sang Negros Electric and Power Corporation (NEPC) ang pag-ilis sang insulated wires.
Ang ila mga personnel ang 16 oras naman nga shifting sa pagtrabaho kag sila ang boluntaryo nga ginabuligan man sang mga personnel sang Negros Electric and Power Corporation (NEPC).
Ang NEPC ang nagpasalig pa nga dugangan nila ang augmentation sa Lunes kag himuon nga 10 ka team.
