Wala napa-untat sang pag-ulan ang pagdugok sang masobra 30 mil nga supporters sang Team Asenso sa ginpatigayon nga Asenso night kag pre-birthday celebration para kay Bacolod City Mayor Alfredo “Albee” Benitez kagab-i.
Sa interview sang Bombo Radyo Bacolod kay Atty Caesar Distrito, spokesperson ni Mayor Albee, nangin madinalag-on ang event nga nag-umpisa alas-4:00 kahapon sang hapon sa Paglaom Sports Complex.
Ang event ang gintambungan sang mga Punong Barangay, SK chairman, Brgy Kagawad kag mga Purok Leaders kag mga Family leaders dala ang ila mga miyembro nga supporter sang Team Asenso.
Paathag ni Distrito nga sila ang wala sang may ginbayaran kag nagprovide lamang sang service vehicle kag pamahaw.
Bisan si Mayor Albee ang nasurpresa nga bisan naga-ulan, wala gid naghalin ang mga pumuluyo
Ang mga ini ang nagapanindugan nga sila ang maga-upod kag padayun nga magasuporta kay Mayor Albee kag Congressman Greg Gasataya.
Ini ang nagapakita man sang pagpalangga kag pagpati sang mga pumuluyo sa liderato sang Benitez Administration.
Natapos ang programa alas-7:00 pa lamang sang gab-i bangod ginhingyo sang alkalde nga i-fast track ang programa bangod makaluluoy ang nabasa sang ulan.
Aminado si Distrito nga antes paman may forecast na ang Pagasa nga mangin maulanon ang tiyempo bangod sa Low Pressure Area nga makadali nga nangin Tropical Depression Querubin kahapon.
Nagpinsar naman ang mga ini sa pagpatigayon sang event sa closed venue, kag ang tagsa ka barangay ang magalive na lamang sa ila tagsa ka Barangay gym.
Apang sa ulihi, nadesisyunan nga dayunon ang programa kun sa diin may ginpatigayon man nga concert kag nagpanagtag sang raffle prizes kaangay sang walo ka nagdaog sang P100,000; duha sa P50,000 kag 20 sa P5,000.
