Ginatudlo sang himata ni Pearl Joy Galve, ang 15 anyos nga dalagita nga nasapwan nga nagaka-agnas na nga bangkay sa sulod sang kampo sa Hda. San Roque, Barangay Cubay, La Carlota City, Negros Occidental sang Agosto 14 nga amay sang biktima ang ulihi nga kaupod sini antes pa man nadula sang Hulyo 29.
Sa interview sang Bombo Radyo Bacolod sa himata sang biktima, nagmaayo ang pamatyag sini sang nahibaluan nga yara na sa kustodiya sang mga otoridad si Rene John Nasis ang step father ni Pearl Joy nga ginalantaw man sang mga ini nga responsable sa natabo sa biktima.
Si Nasis ang boluntaryo nga nagpadulong sa mga otoridad agud nga maathag man ang iya nga bahin.
Suno sa himata sang biktima, nahadlok man ang mga ini bangud mahimo nga may upod ang stepfather sang biktima nga naghimo sang krimen kag nagalibot-libot lamang sa ila lugar kag sila lamang ang ginabantayan.
Suno diri, sang naestorya nila si Nasis, nagapanindugan ini nga wala sang kahilabtanan sa natabo sa biktima.
Wala man ang mga ini nagapati bangud ang ulihi nga chat sang biktima sa ila amo ang upod sini ang iya Papa.
Ginpahayag sini nga natalupangdan niya ang nasambit nga mensahe sang ginbalikan niya ang chat kasunod sang imbestigasyon man sang National Bureau of Investigation.
Sa karun si Nasis ang yara sa kustodiya sang mga otoridad apisar nga wala ini ginpriso bangud wala man sang warrant of arrest batok sa iya.
