Nakuhaan na sang statement ang mga upod sang 43-anyos nga watchman sang quarry nga nasapwan sa sulod sang kampo sang tubo sa Hacienda San Miguel, Barangay San Miguel, ciudad sang La Carlota, kahapon sang aga.
Ang biktima ang ginkilala kay Diovanie Bedonia, tumandok sang Barangay Ma-ao, Bago City, kag nagatrabaho sa quarry site sa Barangay Ma-ao.
Sa interview sang Bombo Radyo Bacolod kay Police Lt. Col. Jonel Guadalupe, hepe sang La Carlota City Police Station, naistorya na nila ang duha ka mga kaupod sang biktima nga ginpahayag sang iloy sini apang indi man makabig nga suspetsado bangud wala man sang witness nga makatudlo sa ila nga sila ang may kahilabtanan sa krimen.
Suno kay hepe gin-imbitahan ang duha para sa questioning kag maathag man kun ano ang natabo.
Suno sa hepe, padayon pa ang ila imbestigasyon agud matumod ang motibo kasubong man matudlo ang suspetsado kag maaresto.
Ginkompirmar man sang hepe nga may yara sila sang narekober nga motorsiklo sa crime scene.
Nahibaluan nagreport sa mga pulis ang mga residente nga nagapuyo malapit sa katubuhan nga may nabatian sila nga may nagpalupok sa kampo.
Gintinguhaan sang kapulisan nga lantawon ang lugar agud makit-an kun may tawo apang bangud malapad ang lugar, wala sang nakita nga tawo ang mga pulis.
Kahapon sang aga, nagreport sa mga barangay officials ang nagatrabaho sa katubuhan nga may nakita sila nga bangkay sang lalaki kag sang ginlantaw sang pamilya, positibo nga ginkilala nga si Bedonia ang bangkay.
Ginhangkat naman sang iloy ni Diovanie Bedonia ang duha ka lalaki nga kaupod niya kahapon nga magpanugid kun may yara sila sang nahibaluan angot sa suspetsado nga nagpatay sa iya anak sa kampo sang tubo sa Hacienda San Miguel, Barangay San Miguel, ciudad sang La Carlota.
Sa interview sang Bombo Radyo kay Vilma Bedonia, naglakat ang iya anak bangud may ginpasummon ini sa barangay nga lalaki nga may balayran sa iya.
Suno kay Mrs. Bedonia, nagtaliwan ang misis ni Diovanie sang tinalikdan nga bulan kag ang kwarta nga inugbayad kuntani sa punerarya para sa lungon ang ginbangka sini sa iya abyan kag nagdaog.
Nangin tayuyon ang pagdaog sa ginbangkahan apang sang ulihi, ginpahayag sang iya abyan nga wala na ang kwarta sa iya bangud ginpanagtag ini sa iban nila nga abyan.
Bangud wala na sang inugbayad ang wala ginhingadlan nga abyan, ginhawiran ni Diovanie ang motorsiklo sini kag gintugyanan nga balikan lang kun may yara na siya sang kwarta nga inugbayad.
Nag-atubangay sa Lupon ng Barangay sanday Diovanie kaupod ang abyan nga sanday Julito Albar kag GB Torres alyas Bonbon apang pagkagab-i, wala na nakapauli ang biktima.
