Gin-cater sang Commission on Elections (COMELEC) sa Negros Island Region ang mga nagparehistro tubtob alas 8:00 kagab-i santo sa instruction sang central office.
Sa interview sang Bombo Radyo Bacolod kay COMELEC-Negros Island Region Director Atty. Lionel Marco Castillano, ginpalawig ang inoras sang pagcater sang mga voter registrants kahapon sa ulihi nga adlaw sang voters registration para sa Barangay and Sangguniang Kabataan Elections 2025.
Suno kay Castillano, nagapangayo man ang COMELEC sang pasaylo sa mga nagparehistro sang Agosto 9 nga nagginutok kag may yara pa sang mga nagkalalipong.
Suno diri, wala man ang mga nakaantisipar nga may yara sang magaparehistro nga gab-i pa lang naglinya na, kag sang pagkaaga may yara na sang nagsal-utanay kag may nagkalalipong na.
Bangud sini si Negros Occidental Election Supervisor Atty. Ian Lee Ananoria ang nagcoordinate kay Bacolod City Mayor Greg Gasataya kun sa diin nagpadala ang alkalde sang railings kag mga kapulisan agud nga mangin organize ang pila sang mga magaparehistro kahapon ang ulihi nga adlaw sang voters registration.
Sang Agosto 9, ang COMELEC-Bacolod ang nakarehistro sang 961 ka mga voter registrant.
Samtang suno kay Castillano, sa tion nga mapirmahan sang presidente ang hagna nga nagapostpone sang BSKE subong nga tuig ang voters’ registration ang magaresume sa ulihi nga semana sang Oktubre 2025 kag magalawig tubtob sa Hulyo 2026.
