Ginmarkahan sang mga presidential candidates ang panugod sa tatlo ka bulan nga campaign period antes ang 2022 Elections pinaagi sa pagpatigayon sang mga rallies kag nagpabutyag sang ila tagsa-tagsa ka mga bersyon kun paano nila mapa-improve ang Pilipinas kun sila ang magapungko sa pwesto.
Gindayon gihapon ni Labor leader kag presidential candidate Leody De Guzman ang pagpatigayon sang iya proclamation rally sa Bantayog ng mga Bayani sa Quezon City apisar nga kulang ini sang permit sa pagtililipon.
Nag-apelar ini sa publiko nga botohon ang mga kandidato nga kaangay nila ukon mga may yara sang kaangay nga sentimento sa mga mamumugon.
Suno kay De Guzman, dapat nila nga kumbinsehon ang mga Filipino nga ang pagbag-o ang indi magahalin sa mga traditional politicians, dynasties ukon mga manggaranon kundi magagikan ini saila kun ila pagasuportahan kag kup-an ang mga kandidato nga may kaangay nga interes.
Nagtambong naman sanday Presidential candidate Senator Panfilo Lacson kag vice presidential bet Senate President Vicente Sotto III sa isa ka Misa antes ang ila proclamation rally sa Imus Grandstand sa Cavite.
Ginpahayag ni Lacson sa iya speech nga ang gobyerno ang pinakadako nga problema sang pungsod kag ang “good governance” amu ang solusyon.
Ginhangkat sini ang publiko nga ikonsiderar ang masunod nga mga henerasyon sa pagpili sa masunod nga mga pinuno.
Sa Philippine Arena sa Bulacan, ginlunsyar ni presidential bet Ferdinand “Bongbong” Marcos Jr. kag vice presidential candidate Sara Duterte ang ila mga kampanya sa atubang sa linibo ka mga supporters.
Ginpahayag ni Marcos nga ang objective sini amu sa pag-isa sang pungsod sa tunga sang mga pagpamahog kaangay sang COVID-19 pamdemic.
Suno diri, ang pag-isa sang mga Filipino ang madugay na sini nga handom para sa mga Filipino.
Ginpatigayon naman ni Manila Mayor Isko Moreno kag sang iya running mate nga si Dr. Willie Ong ang ila proclamation rally sa Kartilya ng Katipunan sa Manila.
Sa iya speech, gin-abisuhan ni Moreno ang publiko nga magpili sang lain kun luyag nila ma-eskperyensyahan ang pagbag-o.
Suno sa iya, kun magahimo sila sang kaangay nga butang, indi man sila dapat mag-ekspektar sang lain nga resulta kag gindumum kun paano ginpamunuan sang Marcos ukon Aquino regime ang pungsod sa sulod sang 39 ka tuig.
Ginlunsyar ni Senator Manny Pacquiao ang iya presidential campaign sa General Santos City.
Bangud sa leg injury, ang iya running mate nga si Deputy Speaker Lito Atienza ang nagpadala lamang sang video message sang sa nagtambong sa event in person.
Suno kay Pacquiao, pagasiguruhon sini nga ang kada Pilipino ang daog kay Manny Pacquiao kag siguruhon sini nga wala sang pigado, ginaagrabyado kag ginapigos.
Pagasiguruhon sini nga wala sang pamilya nga wala sang kaugalingon nga puluy-an bangud ini ang iya ginahimo humalin sadto tubtob sa karun.
Suno sa iya, ang nagahambal sa karun sa ila atubang ang indi isa ka trapo si politiko kundi isa ka lider kag magaprotekta sa ila.
Nagpabutyag naman sang iya kumpyansa kag pagtuo sa mga Filipino si Vice President Leni Robredo kag ginpahayag nga ang isa ka presidente ang dapat mangin tampad kag protektahan ang pondo sang publiko batok sa korapsyon.
Si Robredo, nga gin-updan sang iya mga running mate nga si Senator Francis Pangilinan kag ang mga miyembro sang iya Senate slate, ang nagpahayag nga dapat mangin dapat ang administrasyon kag ang mga public workers ang dapat may integridad sa paghatag sang madasig nga serbisyo.
Suno diri, ang pinuno ang dapat magpanguna sa pagka-ehemplo kag pagtuman sang mga pagsulundan.
Samtang ginstream naman sa Facebook ang e-rallies sanday presidential bets Norberto Gonzales kag Faisal Mangondato.
Ang kampanya ang tubtob sa Mayo 7, duha ka adlaw antes ang eleksyon kag pagahiwaton sa tunga sang COVID-19 pandemic.
