Nangin matawhay ang una nga adlaw sang demolition sang mga balay sa pangpang sang Mambulok Creek sa Purok Lampirong, Barangay 2, ciudad sang Bacolod.
Kaina sang aga, una nga ginbakbak ang kabahin sang BREDCO Port agud nga makasulod ang mga heavy equipment nga magapatigayon sang dredging samtang ang iban nga mga residente ang boluntaryo man nga nangguba sang ila balay.
Iban sa mga ini ang wala naqualify sa relocation site sa Arao kag Abada Escay Relocation Site bangud wala sila sa ila balay sang nagsurvey ang Bacolod Housing Authority apang wala sila sang iban nga mahimo kundi mangita sang sayluhan.
Suno kay Suzette Concepcion, wala naqualify sa relocation sa Arao kag Abada Escay, 20 na siya ka tuig nga nagaistar sa pangpang sang Mambulok Creek gani nagahingyo ini sang financial assistance nagikan sa city government agud nga makapangita sang maistaran.
Suno sa BHA, nadisqualify si Concepcion sa relocation bangud wala sang tawo sa ila balay.
Suno sa iya, nagatrabaho ini sa kalan-an sa Bantayan Park sa Bago City kag ginabisitahan niya lang ang iya balay kada semana gani wala sang nainterview ang BHA kag siya ang nadisqualify.
Bangud wala man sang liwan nga mahimo, ginpaguba nalang ni Concepcion ang iya balay.
Suno naman kay Rose Maria Panes nga nalakip sa una nga walo ka pamilya nga gin-relocate, boluntaryo sila nga nagdemolish sang balay bangud nagsaylo na sila sa Abada Escay.
Suno sa iya, nagamit nila ang atop halin sa daan nga balay apang tubtub pa lang sa pagpapasad ang nalab-utan sang financial assistance nga ginhatag sang city government.
Suno diri, basa sila kun mag-ulan bangud wala pa sang dingding gani nagalaom ini nga makabaton sang dugang nga ayuda para ibakal sang atop.
Sa pihak sini, nagapasalamat si Panes nga may kaugalingon na sila sang duta nga ginatindugan sang balay.
