Ginkompirmar sang provincial administrator sang probinsya sang Negros Occidental nga santo sa report sang mga team commander ukon mga chief of police sa probinsya, nangin maayo ang una nga adlaw nga nagpaidalom sa general community quarantine (GCQ) ang probinsya.
Sa interview sang Bombo Radyo Bacolod kay Atty. Rayfrando Diaz, ginpahayag sini nga nangin maayo ang una nga adlaw.
Nagapati man ini nga ang mga tawo sa probinsya ang nakahibalo kun ano ka delikado ang paggwa sa balay bangud sa pagpamahog sang coronavirus disease 2019 (COVID-19).
Madumduman nga nakasaad sa Executive Order angot sa GCQ nga ginatugutan nga magbiyahe ang tricycle kag trisikad apang isa lamang ka pasahero ang ginatugutan nga makasakay.
Gintuad man sini nga ang pagsulundan sa pagpatuman sa GCQ ang santo sa mando sang National Inter-Agency Task Force (IATF).
Apisar nga nagapatuman na sang GCQ, mandatory sa gihapon ang pagsuksok sang facemasks kag pagpractice sang social distancing.
Ginahingyo man ni Diaz sa publiko nga likawan ang mga gatherings bangud indi pa hilway ang tanan sa COVID infection.
Samtang ginpakigbahin man sini nga naghatag ang probinsya sang mga facemasks sa ospital kasubong man ang mga capitol employees.
Ginkompirmar man sini nga skeletal force sa gihapon ang provincial capitol.
Ginpahayag man sini nga ginkanselar sang probinsya ang pagtugot sa Roll on Roll off ukon RORO ukon ang Sec. 3.3.2 sang EO No. 20-23, Series of 2020 nga nagikan sa tabok sang probinsya bangud madamo ang mga alkalde particular sa Cadiz, Escalante kag Bacolod City.
Ini bangud sa kahangawa sa lugar nga ginhalinan sang mga trucks nga labi man nga naapektuhan sang balatian.
Nagsulat naman ang gobernador sa IATF national agud reviewhon ang provisions natuhoy diri.
