Nangin matawhay kag wala sang may nagtuhaw nga mga problema sa una nga adlaw sang pagbukas sang klase para sa School Year 2024-2025 sa bilog nga Western Visayas.
Sa interview sang Bombo Radyo Bacolod kay Hernani Escullar Jr., public information officer sang Department of Education (DepEd) Region 6, nagpatigayon sang simple nga flag raising ceremony kaina sang kaagahon.
Suno diri, santo sa mandato sang DepEd central office, nagpatigayon na sang lectures sa una nga adlaw sang klase.
Gindumdom man sini nga sadto, may isa ka semana pa nga nagapaninlo ang mga estudyante sa pag-umpisa sang School Year, apang ini ang nadula na sumugod sang gin-implementar ang Brigada Eskwela.
Ang programa ang ginhuman sa tinutuyo nga ma-address ang aducation gap.
Ginapakamaayo man ni Escullar nga nagakoordinar ang mga school personnel sa mga local enforcement authorities agud mabantayan ang seguridad sang mga kabataan partikular na sa pagtabok sa mga pedestrian lane.
May-ara man sang school personnel nga trained sa pag-address sa mga common nga balatian kaangay sang hilanat.
Paathag ni Escullar nga natapos na ang enrollment period, apang indi nila pag idingot sa mga kabataan ang tyansa nga maka-eskwela gani pasalig sini nga tanan nga pampubliko nga eskwelahan ang magabatun gid sang late enrollees.
Dugang pa sini nga libre man ang pag-eskwela sa mga pampubliko nga eskwelahan gani wala sang rasun nga indi ipa-enroll ang mga kabataan.
