Nangin matawhay ang una nga adlaw sang pagpatuman sang border check-up points sa ciudad sang Bacolod.
Sa interview sang Bombo Radyo kay Bacolod City Police Office (BCPO) director Police Col. Henry Biñas, ginpahayag sini nga malaka lang ang mga salakyan—pampubliko kag pati na ang mga pribado, nga nagbiyahe kahapon.
Ginkumpirmar man ni Biñas nga indi lang border check-up points ang ila ginpahamtang kundi pati na ang mga inner check-up points agud mas ma-regulate pa gid ang hulag sang mga tawo.
Paga-obserbahan man sini ang kinalain sang pagpatuman sang check-up points subong nga adlaw kag sang kahapon bangud nga nahibaluan nga may yara sang “no movement” nga ginapatigayon kada Domingo kun sa diin sirado ang tatlo ka mga dalagkuan nga merkado sa ciudad.
Suno kay Biñas, pagalantawon niya kun mas madamo ang tawo subong nga adlaw apisar pa sa pagpatuman sang Home Quarantine Pass policy bangud nga may yara sang mga opisina subong kag bukas na ang mga public markets.
Samtang, ginkumpirmar naman sang team leader sang check-up point sa Bangga Cegasco, Barangay Pahanocoy nga matawhay kag maayo ang dalagan sang ila nga pagbantay sa border.
Suno kay P/Lt. Abdun De Mateo, deputy station commander sang Bacolod Police Station 8, ginpahayag sini nga wala gid nila ginapasulod sa Bacolod ang mga indi essential workers kag wala sang importante nga pagahimuon sa ciudad.
Ginapabalik man nila ang mga tawo nga wala sang dokumento kaangay na lamang sang company ID, certificate of employment kag business permit sa mga may yara sang negosyo.
Suno pa kay De Mateo nga 24 oras sila nga nagabantay sa border kun sa diin shifting ang duty sang mga personnel.
Kada shift ang ginalakipan sang anom ka police personnel, miyembro sang Bacolod Traffic Authority Office (BTAO) kag force multiplier.
Sa pihak nga bahin, nagpasalig naman si Biñas nga iya tsekyaron kun sa diin nga check-up point natabo ang nag-viral sa social media nga mag-asawa nga malibod kuntani sang kasag sa Bacolod apang wala gintugutan nga makasulod kag ginpabalik sa ila ginhalinan.
Sa impormasyon nga nakuha sang Bombo Radyo, nagluntad ini sa Bacolod-Talisay border kag mga taga-ciudad sang Silay ang mag-asawa.
