Nangin matawhay ang pagresume sang plebisito angot sa Joint Venture Agreement sa tunga sang Central Negros Electric Cooperative kag PrimElectric subong nga adlaw.
Sa Bago City Elementary School, 23 ka presinto ang nahamtang apang ang bilog nga Bago City ang may 24 ka mga barangay.
26,000 ang member-consumers sa Bago antes ang cleansing sang listahan apang 20,000 nalang ang nabilin sang ginlimpyuhan ang masterlist.
50 pa lang ang nakaboto as of 9:30 kaina sang aga kag kalabanan sa mga ini ang may bitbit nga dokyumento nga notarized nga nagapakita nga sila ang proxy sang ila himata ukon kakilala nga indi makasarang magpadulong sa polling center.
Suno kay Atty. Theodora Gardose, chairperson sang District 6 Plebiscite Committee, matawhay ang plebisito halin kaina sang aga.
Sang wala pa ang cleansing sang masterlist suno sa iya, madamo nga member-consumers ang nagreklamo nga wala ang ila ngalan sa listahan.
Nagalaom naman ini nga mangin matalunsay ang plebisito bangud nalimpyuhan na ang masterlist.
Nagpanugyan naman ini sa mga member-consumers nga may problema nga indi magkataka sa pag-approach sa ila bangud nakahanda gid sila nga magbulig.
Suno naman kay Eden Rey Arellano sang Barangay Lag-asan, aga pa ini nagboto kag YES ang iya nga boto, kaupod ang iya misis nga nagboto man nga YES.
Nangin proxy man si Arellano sang 10 ka senior citizens nga ila himata kag kilala nga indi na able nga magboto.
Suno kay Arellano, gusto sini nga madayon ang joint venture agreement bangud madamo ang problema nga ila ginapadangat sa CENECO nga wala man sang nagakaigo nga tikang kaangay sang gabok nga poste sang kuryente nga wala man gihapon maislan.
Nagalaom naman ini nga kun madayon ang JVA, tutukan sang CENECO-PrimElectric ang pagpa-improve sang ila nga serbisyo, indi lang sa Lag-asan apang sa bilog nga service area.
